Percakapan Bahasa Sunda Tema Pahlawan Nasional Ir. H. Juanda Kartawijaya

- Dina Review -





Percakapan untuk 3 orang

Ir. H. Juanda Kartawijaya

Ir. H. Juanda Kartawidjaya

Fitri: "Bu, dupi pahlawan nasional aya anu kawitna ti Tasikmalaya?"

Bu Guru : "Puguh bae atuh aya mah, mun teu salah mah aya tiluan."

Fitri : "Saha bae jenenganana teh, Bu?"
Bu Guru : Geura urang tataan. Kahiji, K.H. Zainal Mustofa. Kadua, Ir. H. Juanda Kartawijaya. Katilu, Laksamana Laut R. Eddy Martadinata."

Ridwan : "Bu, abdi hoyong terang kumaha perjoangan aranjeunna dugi ka kenging gelar Pahlawan Nasional."

Bu Guru : "Heug atuh, regepkeun geura! Pa Juanda teh pituin Tasikmalaya, lahirna dina kaping 14 Januari 1911. Anjeunna teh putra cikalna Bapa Kartawijaya, mantri guru jaman Walanda."

Fitri : "Mantri Guru teh naon, Bu?"

Bu Guru : "Mun ayeuna mah kapala sakola. Urang teraskeun gera. Pa Juanda kalebet anu nyongcolang kapinteranna. Kituna teh ti nuju murangkalih keneh. Ti HIS dugi ka THS, prestasina teh nyugemakeun pisan."

Ridwan : "Atuh kenging hadiah, Bu?"

Bu Guru : "Nya puguh bae, atuh. Nalika nuju di THS, anjeunna kenging beasiswa, anu keur urang jaman harita mah pohara pisan langkana. Kajaba lamun urangna pinter."

Ridwan : "Dupi perjoangan anjeuna teh naon bae, Bu?"

Bu Guru : "Loba pisan lamun kudu ditataan hiji-hiji mah. Ieu mah diantarana bae. Dina widang pangwangunan, anjeuna teh janten Kapala Jawatan Kareta Api anu munggaran. Pa Juanda sukses mingpin jeung ngabebenah PJKA anu ramijud ti jaman Jepang keneh."

Fitri : "PJKA teh upami ayeuna mah PT. KAI tea nya, Bu?"

Bu Guru : "Enya, gening apal Fitri mah. Urang teraskeun nya. Dina widang politik jeung pamarentahan, Pa Juanda sababaraha kali janten menteri. Ti aun 1964 dugi ka pupusna taun 1963, meh terus-terusan janten menteri. Nu matak Pa Juanda mah kenging julukan Menteri Maraton."

Ridwan : "Naon maksudna teh, Bu?"

Bu Guru : "Menteri Maraton teh maksudna pejabat anu meunang jabatan menteri terus-terusan. Puncak jabatan Pa Juanda, dina taun 1957 anjeuna kapeto jadi Perdana Menteri anu ngarengkep jeung jabatan Menteri Pertahanan. Salami mingpin kabinet, anjeunna tiasa ngungkulan sareng numpes pemberontakan PRRI/PERMESTA, DI/TII, jeung sesa-sesa RMS di Pulo Seram, Maluku."

Ridwan : "Wah, upami kitu mah ageung pisan jasa Pa Juanda teh, Bu!"

Bu Guru : "Enya, nu matak pantes pisan upama Pa Juanda kenging penghargaan Pahlawan Nasional teh. Kanggo mieling perjoangan Ir. Juanda, sababaraha tempat jeung jalan dinamian jenengan anjeunna. Ku kituna kapinteran jeung perjoangan Pa Juanda ku hidep duaan kudu dijadikeun conto."

Katerangan kecap

1. tataan = nyebutan hiji-hiji (barang atawa ngaran jelema)

2. medar = nerangkeun

3. pituin = asli, tulen

4. mungaran = mimiti

5. ramijud = acak-acakan, teu beres

6. kapeto = kapilih

7. konsep = rarancang

8. HIS = Sakola Dasar (baheula)

9. THS = Ngaran paguron luhur (ayeuna mah jadi ITB)

Dicutat tina : Buku Sukapura taun 2005