Cerita Sejarah Pasantren Suryalaya dina Bahasa Sunda

- Dina Review -

Pasantren Suryalaya

Pasantren Suryalaya diadegkeun dina taun 1905 ku Syekh Abdullah Mubarok bin Nur Muhammad (Abah Sepuh). Anjeuna teh ramana KH. Shohibul Wafa Tajul Arifin, anu kawentar kenging jujuluk Abah Anom, sesepuh Pasantren Suryalaya ayeuna.

Pasantren Suryalaya pernahna di Kampung Godebag, Desa Tanjungkerta, Kacamatan Pagerageung, Kabupaten Tasikmalaya. Asalna mah Suryalaya teh pasantren leutik anu aya di pakampungan tur henteu kawentar kawas ayeuna, anu geus robah jadi pasantren gede lega ambahan.

Kiwari, santri katut ihwan Pasantren Suryalaya sumebar di sakuliah Indonesia, malah nepi luar negeri sagala. Ti Malaysia, Singapura, jeung ti Brunei Darussalam loba anu datang pikeun diajar di dinya.

Abah Anom mingpin Pasantren Suryalaya ti kawit taun 1953. Anjeunna aktif ngarojong pamarentah ngalaksanakeun pangwangunan dina widang pertanian, atikan, lingkungan hidup, sosial, kasehatan, koperasi sareng politik.

Pangwanggunan dina widang lingkungan dilaksanakaeun ku Abah Anom ti taun 1954 ku cara ngajaga Daerah Aliran Sungai (DAS) Citanduy supaya ulah longsor. Anjeuna melak awi sareng kai anu tareuas di sapanjang sisi Walungan Citanduy, ti sabudeureun pasantren tepi ka girang. Kana jasa-jasa anjeunna, dina kaping 5 Juni taun 1980, Abah Anom dileler Kalpataru (penghargaan dina widang lingkungan hidup) ti pamarentah Republik Indonesia.

Salian ti ngalaksanakeun atikan kapasantrenan, kalayan dijejeran ku Yayasan Serba Bakti, dina taun 1966, di Pasantren Suryalaya diadegkeun atikan umum, nyaeta Institut Agama Islam Latifah Mubarokuyah (IAILM).

Dina widang sosial, taun 1980 Yayasan Serba Bakti Pasantren Suryalaya ngadegkeun PAnti Rehabilitasi Penyalahgunaan Narkotika untuk remaja anu nelahna Inabah. Alhamdulillah, sanggeus dididik di Inabah, puluhan rebu nonoman anu kajiret ku narkoba teh bisa cageur tur teu kacanduan deui. Kana jasa-jasa Abah Anom dina widang sosial, hususna anu patali jeung Inabah, dina taun 1985, Presiden Suharto ngeleler Satya Lencana Kebaktian Sosial ani dipasrahkeun ku Menteri Sosial harita, nyaeta Ibu Nani Sudarsono.

Lobana panghargaan jeung kamajuan nu katarima henteu matak ngarobah pola didikan kapasantrenan anu geus dilaksanakeun samemehna. Suryalaya angger jadi pasantren anu ngajarkeun torekat jeung tasaup kalawan henteu nyapirakeun kamekaran teknologi dina sagala widang jaman moderen kawas ayeuna.

Katerangan Kecap

1. kawentar = kamashur

2. jujuluk = ngaran atawa sesebutan tambahan

3. tasaup = elmu kabatinan pikeun ngalemesan budi

4. atikan = pendidikan

5. paguron luhur = perguruan tinggi

6. kamekaran = kamajuan

7. nonoman = pamuda

8. kajiret = kacangcang

Dicutat tina : Buku Sukapura taun 2005